Billie Eilish
Billi Ayliş Payret Beyrd Okonnell (ing. Billie Eilish Pirate Baird O'Connell; 18 dekabr 2001[…], Los-Anceles, Kaliforniya) — amerikalı müğənni-mahnı yazarı. Onun yaradıcılıq fəaliyyətində ilk əhəmiyyətli uğuru 2015-ci ildə qardaşı Finneas Okonnellin bəstələyib istehsal etdiyi "Ocean Eyes" kompozisiyası ilə əldə edilib. 2017-ci ildə işıq üzü görən "Don't Smile at Me" adlı debüt minialbomu beynəlxalq miqyasda diqqət cəlb edib. Həmin albom ABŞ, Birləşmiş Krallıq, Kanada və Avstraliya kimi iri musiqi bazarlarında ilk on beşlik sıralamasında qərarlaşıb.
Billi Ayliş 2019-cu ildə debüt studiya albomunu - "When We All Fall Asleep, Where Do We Go?" adlı əsərini təqdim edib. Bu albom həm ABŞ-nin "Billboard 200", həm də Birləşmiş Krallığın albomlar çartında zirvəyə ucalıb. "Bad Guy" sinqlının geniş populyarlıq qazanması nəticəsində bu albom 2019-cu ilin ən çox satılan musiqi layihələrindən biri olub. 2020-ci ildə Ayliş qardaşı ilə birlikdə Ceyms Bond kinoseriyasının "Ölməyə vaxt yoxdur" filminə saundtrek bəstələyib və ifa edib. Bu əsər Birləşmiş Krallıq sinqllar çartında birinci pilləyə yüksəlib və 2022-ci ildə ona "Oskar" mükafatı gətirib. İfaçının "Everything I Wanted", "My Future", "Therefore I Am" və "Your Power" sinqlları ABŞ və Birləşmiş Krallıq musiqi çartlarında top-10 sırasına daxil olub. 2021-ci ildə təqdim etdiyi "Happier Than Ever" adlı ikinci studiya albomu 25 ölkənin musiqi çartında lider mövqedə qərarlaşıb. 2023-cü ildə "Barbi" filmi üçün yazdığı "What Was I Made For?" kompozisiyası Birləşmiş Krallıqda birinci yerə yüksəlib. Sənətçinin üçüncü studiya albomu "Hit Me Hard and Soft" 17 may 2024-cü il tarixində ictimaiyyətə təqdim edilib.
Billi Ayliş musiqidə əldə etdiyi nailiyyətlər və qazandığı mükafatlar ilə müasir pop sənətinin önəmli simalarından birinə çevrilib. Sənətçi yeddi dəfə "Qremmi" mükafatına, iki dəfə "American Music Awards" mükafatına layiq görülüb və "Ginnesin Rekordlar Kitabı"nda iki dəfə qeydə alınıb. Bunlarla yanaşı, üç "MTV Video Music Awards", üç "Brit", bir "Qızıl Qlobus" və bir "Oskar" mükafatlarının sahibidir. Sənətçinin əhəmiyyətli ictimai nüfuzu "Time" jurnalı tərəfindən də təsdiqlənib - 2019-cu ildə "Time 100 Next" və 2021-ci ildə "Time 100" siyahılarına daxil edilib. Amerika Səsyazma Sənayesi Assosiasiyası (RIAA) və "Billboard" nəşrinin hesablamalarına əsasən, Billi Ayliş 2010-cu illərin ən yüksək nəticələr əldə edən ifaçılarından biri kimi qiymətləndirilib.
Similar Artists