The Neighbourhood
The Neighbourhood (bəzən "THE NBHD" kimi göstərilir) — 2011-ci ildə Kaliforniya ştatının Nyuböri-Park şəhərində qurulmuş amerikan rok qrupu. Qrup müğənni Cessi Ruterford, gitaraçılar Ceremi Fridman və Zak Abels, basçı Mayki Marqotdan ibarətdir. Qrupun 2014-cü ildən zərbçisi olan Brendon Frid 2022-ci ildə qrupdan ayrıldı. Qrup “I'm Sorry…” və “Thank You” minialbomlarını buraxdıqdan sonra 2013-cü ildə Columbia Records vasitəsilə ilk studiya albomu “I Love You.”-nu yayımladı. Albomun “Sweater Weather” mahnısı 2013-cü ildə Billboard Hot 100 çartında 14-cü pilləyə yüksəldi, mahnı uzun müddət sonra TikTok-da populyarlıq qazandı və Spotify-da ən çox dinlənən mahnılardan birinə çevrildi.
Elə həmin il qrup “The Love Collection” adlı minialbom; və 2014-cü ilin noyabrında “#000000 & #FFFFFF” adlı miksteyp yayımladı. İkinci albom, “Wiped Out!” 30 oktyabr 2015-ci ildə buraxıldı. Öz adlarını daşıyan üçüncü studiya albomu “The Neighbourhood” 9 mart 2018-ci ildə işıq üzü gördü. Həmin albomun əlavə treklərinin olduğu versiyası “Hard to Imagine The Neighbourhood Ever Changing” 2 noyabr 2018-ci ildə buraxıldı. Dördüncü albom “Chip Chrome & the Mono-Tones” 25 sentyabr 2020-ci ildə yayımlandı. Qrup fəaliyyətinə 22 fevral 2022-ci ildə fasilə verdi.
Qrupun solisti Cessi Ruterford 2016-cı ildə SoundCloud üzərindən digər layihəsi olan The Factoury üçün bir neçə mahnı yayımladı, həmçinin o, solo karyerasına davam etdi və 2023-cü ilin martında Atlantic ilə müqavilə bağladı.
Similar Artists